Vex hratt í mörgum ám

Samkvæmt Veðurstofunni hefur mikið rignt á Suðurlandi síðan í gær og hafa veðurspár gengið vel eftir. Mest úrkoma hefur mælst í Bláfjöllum, en þar er sólarhringsúrkoma nú um 150 mm.

Búast má við mikilli úrkomu á Suðurlandi allan næsta sólarhring.

Mestu flóðin hingað til hafa verið á svæðinu við Mýrdalsjökul. Enn hafa ekki verið mjög miklir vatnavextir á vatnasviði Hvítár og Ölfusár en rennsli þar á eftir að vaxa allan morgundaginn.

Mjög mikið rennsli hefur verið í Soginu. Rennsli þar er nú um 234 m³/s við Ásgarð og er enn að vaxa. Meðalrennsli í Soginu er um 109 m³/s. Hámarkið þar verður líklega á morgun en spáð er mikilli úrkomu þar í nótt.

Rennsli Múlakvíslar og Jökulsár á Sólheimasandi hefur líklega sjaldan orðið meira undanfarna áratugi en í jökulhlaupum. Í Krossá í Þórsmörk er einnig mjög mikið rennsli og er áin farin að dreifa mikið úr sér.

Enn á eftir að vaxa mjög í ám á svæðinu frá Mýrdalsjökli til Hornafjarðar. Veðurstofan er með vatnhæðarmæli í Djúpá, rennsli þar er nú komið yfir 100 m³/s og vex hratt. Gera má ráð fyrir að rennsli Djúpár og annarra vatnsfalla í Skaftafellssýslu haldi áfram að vaxa þangað til síðdegis á morgun.