Um miðjan apríl opnaði Penninn Eymundsson verslun að Smiðjuvegi 7 í Vík í Mýrdal. Verslunin er staðsett í glænýju húsnæði sem Penninn ehf. byggði en húsnæðið þykir mikil lyftistöng fyrir Mýrdælinga.
Húsnæðið er alls 1.023 fm, þar af er verslunin Pennans 623 fm. Í sama húsnæði er líka ráðhús Mýrdalshrepps en það flutti einnig inn í apríl og hefur 250 fm til umráða. Í gær, þriðjudag, opnaði svo fyrsta apótekið í Vík í Mýrdal þegar Apótekarinn opnaði dyrnar sínar í 100 fm plássi.
„Salan fór rólega af stað. Það er alltaf rólegt eftir páska í ferðabransanum og þá var ýmislegt eftir sem hefur verið klárað síðan. Gatan var malbikuð í lok júní, gangstéttar voru kláraðar í síðustu viku og svo framvegis. Júní var ágætur og það stefnir í góðan júlímánuð hjá okkur,“ segir Ingimar Jónsson, forstjóri Pennans, í samtali við sunnlenska.is.
Erlendir ferðamenn með 85% af veltunni
„Viðtökurnar hafa verið mjög góðar og ég heyri ekki annað en heimamenn séu ánægðir. Þeir kaupa leikföng og gjafavörur, ritföng og rekstrarvörur, bækur og kaffi. Það hefur komið á óvart hvað bóksalan í heild er ágæt. Heimamenn eru með 15% af veltunni og erlendir ferðamenn 85%.“
„Fatnaður og ull er stærsti vöruflokkurinn hjá okkur enda erum við með vörur frá 66 N, Kidka á Hvammstanga, Ístex, Alrúnu, Glófa og Rammagerðinni, ásamt eigin innflutningi. Þar á eftir koma gjafavörur, minjagripir og bækur,“ segir Ingimar ennfremur.
