Í síðustu viku var undirritaður samningur milli Grímsnes- og Grafningshrepps og HR smíði um byggingu Björgunarmiðstöðvar á Borg.
Sextán tilboð bárust í verkið og hljóðaði tilboð HR smíði upp á tæplega 221 milljón króna og var 1,6% yfir kostnaðaráætlun verksins, sem er tæpar 217,4 milljónir króna.
Ný björgunarmiðstöð verður rúmir 1.100 fermetrar að stærð með millilofti og mun hýsa starfsemi Hjálparsveitarinnar Tintron og Brunavarna Árnessýslu. Með framkvæmdinni verður aðstaða viðbragðsaðila á svæðinu stórbætt og öryggisinnviðir sveitarfélagsins styrktir til framtíðar.
Áætluð verklok eru 20. desember næstkomandi.