Í síðustu viku afhenti Selfyssingurinn Rúnar Hroði Geirmundsson vökudeild Barnaspítala Hringsins ávísun upp á rúmar 4,2 milljónir króna. Upphæðinni safnaði hann með áheitum vegna þátttöku sinnar í Járnkarli í maí síðastliðnum.
Rúnar Hroði ákvað að keppa í heilum Járnkarli í Jacksonville í Flórída, gagngert til að safna fyrir nýjum hitakassa. Nýr kassi kostar 12 milljónir króna. Rúnar Hroði kláraði keppnina, sem samanstendur af 4 km sundi, 180 km hjólreiðum og heilu maraþonhlaupi. Söfnunarmarkiðið náðist því miður ekki en fjórar milljónir er engu að síður stór upphæð fyrir Vökudeild og hennar mikilvæga starf.
„Það var svo falleg og einlæg tilfinning að fara á Barnaspítalann og hitta dömurnar og það var tekið svo fallega á móti manni. Ég fann að þetta var mikilvægt, eins og þær sögðu mér. Mig langaði náttúrulega að safna 12 milljónum og fyrir mér er það markmið sem mistókst. Þær sögðu mér að þegar kemur að einstaklingsframlagi þá er þetta stjarnfræðilega stórt og mikið og kemur sér rosalega vel – sem er ógeðslega gott fyrir mig að heyra og hjálpar mér aðeins að sætta mig við árangurinn,“ segir Rúnar Hroði í samtali við sunnlenska.is.
Glaður að geta sett punktinn við verkefnið
Undirbúningur fyrir Járnkarl tók tvö ár og kláraði Rúnar Hroði sig – að eigin sögn – á líkama og sál. „Verkefnið mistókst með frábærum árangri, og ég er afar svekktur að klára ekki það sem ég hafði lofað, en ég er samt svakalega stoltur.“
„Þetta er í alvörunni í fyrsta skipti á ævinni sem ég set mér opinbert markmið og það mistekst. Það er svolítið erfitt en ég er glaður og það er gott að láta gott af sér leiða og geta sett punkt við þetta verkefni, því var langt og strembið. Það eru svona hlutir sem fólk mun minnast manns fyrir og það er gott og æðislegt fyrir strákana mína,“ sagði Rúnar Hroði að lokum.
