Veðrið lék við gesti afmælishátíðar Reykholts í Bláskógabyggð en haldið var upp á 100 ára afmæli þorpsins þann 20. maí síðastliðinn. Í tilefni tímamótanna voru afhjúpuð fræðsluskilti um sögu þorpsins.
Það var Bjarni Kristinsson á Brautarhóli, Bjarni í Bjarnabúð, sem klippti á borðann og opnaði þar með sögu-skiltasvæðið formlega og afhjúpaði eftirmynd af Jóni Halldórssyni sem byrjaði þetta allt saman þegar hann gaf land og fé til að byggja skóla í Reykholti fyrir 100 árum síðan.
Börn úr Reykholtsskóla sungu undir stjórn Unnar Malínar og Karl Hallgrímsson spilaði undir og Bjarni Harðarson flutti tölu um Jón Halldórsson og upphaf uppbyggingar Reykholts. Að því loknu leiddi Sveinn Sæland á Espiflöt sögugöngu með leiðsögn um Reykholt.
Um það bil 250 gestir mættu í afmælið og var dagurinn vel heppnaður í alla staði. Boðið var upp á léttar veitingar við opnunina, hverabraut við Reykholtshver og að lokum var kaffisamsæti í Aratungu.
Myndirnar tala sínu máli.
