Vel heppnaður forvarnarmánuður í FSu

Október var forvarnarmánuður í Fjölbrautaskóla Suðurlands. Í hverri viku var boðið upp á fyrirlestra sem voru aðgengilegir fyrir alla nemendur skólans og fluttir í sal skólans.

Efnistök voru fjölbreytt, en meðal efnis var geðvernd, geðheilsu, rafrettur og munntóbak, verkefnið Útmeð‘a, erindi um kannabisneyslu og afleiðingar hennar og forvarnarfyrirlestur um kynsjúkdóma og ótímabæra þungun.

Fyrirkomulagið tókst vel, mæting var fín og áhugi mikill. Fyrirlesararnir voru líka ánægðir, fannst gaman að koma í skólann og finna fyrir áhuga nemenda.

Í kjölfar þessa átaks má nefna að á dagskránni er að stofna 0% FSu í næstu viku, en sú hugmynd kom í kjölfar fyrirlestursins um rafrettur og vímulausan lífsstíl. Það eru fleiri 0% hópar í öðrum framhaldsskólum og stefnt á meira samstarf á milli þeirra. Þessir hópar eru angi af IOGT sem eru alþjóðleg bindindissamtök en 0% hóparnir eru ungt fólk sem hittist og brallar eitthvað skemmtilegt saman án áfengis og vímuefna.

Forvarnarfulltrúi FSu er Guðbjörg Grímsdóttir.