Vinna við uppstillingu fyrstu stálbitanna í nýju Ölfusárbrúna gengur vel en fyrstu stálbitarnir voru fluttir til landsins í apríl. Von er á næsta skipi með stálbitum seinnipartinn í júní.
Bitarnir verða fluttir til Þorlákshafnar og þar með verða allir stálbitar í brúna komnir til landsins en þeir eru framleiddir í verksmiðjum Norvik í Póllandi.
Byrjað er að rafsjóða samtengingar bitanna. Einnig er unnið að því að koma lagnakerfi í brúargrindina en í brúna verða settar lagnir veitustofnana fyrir heitt og kalt vatn, háspennustrengi og ljósleiðara. Gengið verður frá öllum lögnum í brúargrindina áður en hún verður færð yfir ána.
Starfsmönnum við verkið hefur fjölgað vegna þessara verkþátta og eru nú um 60 starfsmenn á framkvæmdasvæðinu.
Vinna við jarðvegsskipti og lagnaskurði í vegstæðinu austan við Ölfusá er komin vel á veg og áætlað er að hefja fljótlega útlögn styrktar- og burðarlaga undir malbik.
