Í síðustu viku komu konur frá Sambandi sunnlenskra kvenna í heimsókn á Heilbrigðisstofnun Suðurlands á Selfossi og færðu fæðingadeildinni að gjöf glaðloftstæki, mettunarmæli fyrir nýbura og fósturshjartsláttarsírita.
Heildarverðmæti gjafarinnar er rúmar 2,7 milljónir króna.
Glaðloftstækið kemur í stað eldra tækis og er það mun nákvæmara að því leyti að konan nýtir glaðloftið betur og frásog er af tækinu. Með mettunarmælinum er hægt að skima fyrir alvarlegum hjartagöllum hjá nýburum. Fósturhjartsláttarsíritinn er sömuleiðis mikil bylting, hann mælir hjartslátt fósturs á meðgöngu sem og tíðni og lengd samdrátta. Hann er þeirri tækni búin að hægt er að greina á milli hjartsláttar fósturs og móður og lætur vita ef tíðni þessara hjartslátta skarast. Einnig er hægt að tengja tækið beint við tölvu sem gerir það að verkum að hægt er að senda hjartsláttarrit rafrænt til frekari skoðunar hjá sérfræðingi ef þörf er á.
Í frétt á heimasíðu HSU kemur fram að þessar gjafir séu langþráð viðbót fyrir fæðingardeildina sem bæti öryggi móður og barns á meðgöngu og eftir fæðingu og eru kvenfélögum innan SSK færðar hugheilar þakkir fyrir. Það er fyrir þeirra góða starf að fæðingadeild HSU er mun betri tækjum búin en annars væri og það verður seint fullþakkað.
Samband sunnlenskra kvenna hefur í gegnum tíðina verið dyggur stuðningsaðili HSU. SSK á stórafmæli um þessar mundir, en sambandið verður 90 ára þann 30. september næstkomandi.