Fyrir skömmu var haldin, á Hótel Heklu á Skeiðum, uppskeruhátíð Vaxtarsprota á Suðurlandi.
Sextán þátttakendur voru útskrifaðir eftir að hafa tekið þátt í verkefninu og setið námskeið undanfarna mánuði.
Þátttakendur hafa unnið að eigin hugmyndum sem tengjast atvinnusköpun í heimabyggð sinni. Verkefni þeirra eru fjölbreytt og á sviði matvælaframleiðslu, smáiðnaðar, verslunar- og ferðaþjónustu.
Verkefnið er á vegum Impru á Nýsköpunarmiðstöð Íslands og Framleiðnisjóðs landbúnaðarins og framkvæmd verkefnisins á Suðurlandi var unnin í samvinnu við Búnaðarsamband Suðurlands og Atvinnuþróunarfélag Suðurlands.
Alls hafa 180 manns lokið námskeiðum á vegum verkefnisins. Þessir aðilar hafa unnið að 145 verkefnum.