Vatnsbólið fyrir Úthlíð í Biskupstungum er nánast tómt og því lítið sem ekkert kalt vatn á svæðinu. Langvarandi þurrkar hafa gert það að verkum að staðan á vatnstökusvæði Úthlíðar er lág.
Vatnsbólið fyrir Úthlíð liggur hátt og þýðan hefur ekki náð þangað. Í tilkynningu frá Veitum segir að úrkoman í janúar og febrúar hafi aðeins verið 14% af meðaltalinu fyrir þann árstíma.
Mikið er af fólki í bústöðum um páskahelgina ein einhverjir hafa þegar snúið heim vegna vatnsskortsins. Veitur hvetja fólk til að stytta sturtuferðir, láta ekki kalda vatnið renna viðstöðulaust að óþörfu og nota spartakkann á klósettinu þegar það dugar.
Sumarhús með varmaskiptum eru líka heitavatnslaus og mikilvægt að ekki sé látið renna í heita potta þar sem eru varmaskiptar, því þeir nota þá mikið af upphituðu köldu vatni.