Undanfarnar vikur hafa orðið verulegar breytingar við sporð Sólheimajökuls sem hafa gert aðkomu að jöklinum erfiðari og varasamari. Óstöðugur jökulís við jökullónin og grjóthrun úr hlíðum geta skapað hættu fyrir fólk sem fer um svæðið.
Þetta kemur fram í tilkynningu sem Veðurstofan sendi frá sér í dag.
Lítið lón hefur myndast austan við sporð Sólheimajökuls. Á milli þess og aðaljökullónsins framan við Sólheimajökul hefur myndast íshaft, sem myndar tengingu frá ströndinni að jöklinum. Haftið hefur minnkað hratt undanfarnar vikur vegna bráðnunar og kelfingar en til skýringar verða keflingar þegar jakar brotna fram í lónið. Nú getur hætta skapast af því að fara um íshaftið, bæði að óstöðugur ís gefi sig og að fólki skriki fótur og falli í lónin öðru hvoru megin við haftið. Aðkoma að sporði Sólheimajökuls er því mun erfiðari og varasamari en áður.
Miklar breytingar á aðstæðum hafa orðið frá degi til dags og óvissa er um áframhaldandi þróun. Mikilvægt er að fólk sem fer um svæðið á eigin vegum gæti varúðar en leiðsögumenn á svæðinu vakta breytingarnar og ferðaþjónustufyrirtæki hafa nú í forvarnarskyni fellt niður ferðir og hugað er að nýjum og öruggari leiðum.
Hætta grjóthruni á aðkomuleiðinni að Sólheimajökli
Veðurstofan vekur jafnframt athygli á grjóthrunshættu úr Jökulhaus, fjallinu ofan aðkomuleiðarinnar að suðaustanverðum Sólheimajökli. Fólk ætti að lágmarka viðveru undir bröttum hlíðum. Grjót sem falla á aðkomuleiðina geta verið stór og skapað verulega hættu fyrir ferðafólk. Meðfram öllum göngustígunum er grjóthrunshætta og því er mikilvægt að sýna aðgát.
Ferðafólk er hvatt til að skoða brattar hlíðar vel og vera vakandi fyrir merkjum um grjóthrun, svo sem nýföllnu grjóti eða hljóðum úr hlíðinni. Grjóthrun verður skyndilega og ekki er hægt að spá nákvæmlega fyrir um hvenær það á sér stað. Líkur á grjóthruni geta þó aukist í mikilli úrkomu og við snöggar hitabreytingar, til dæmis þegar frýs og þiðnar til skiptis.
Meðfylgjandi myndir tók Jón Heiðar Andrésson, yfirleiðsögumaður hjá Asgard Beyond, og sýna þær núverandi aðstæður.
