Í ljósi þess að framundan er ein fjölfarnasta ferðahelgi ársins telur Veðurstofan ástæðu til að vara við hættu á grjóthruni, yfirborðsskriðum og farvegabundnum aurskriðum við brattar hlíðar í kjölfar úrkomu.
Fólki er bent á að sýna aðgát við akstur á vegum sunnan- og vestanlands og fylgast með upplýsingum um aðstæður á vef Vegagerðarinnar. Einnig ber ferðafólki að forðast að tjalda undir bröttum hlíðum, þar sem grjóthrun getur orðið lífshættulegt.
Veðurstofan heldur úti skriðuvakt og fylgist grannt með aðstæðum næstu daga. Þeir sem verða varir við grjóthrun eru beðnir um að tilkynna það á skriduvakt@vedur.is. Gott er að láta fylgja með myndir, nákvæma staðsetningu og tímasetningu.
Veðurdagatal
Föstudagur 1. ágúst
Á morgun nálgast ört dýpkandi lægð landið úr suðvestri og mun hún stýra veðrinu næstu daga. Þá er útlit fyrir vaxandi suðaustanátt, 8-15 m/s seinnipartinn og dálítil rigning með köflum, en að mestu bjart á norðaustanverðu landinu.
Um kvöldið ganga skil frá lægðinni yfir landið. Þá hvessir enn frekar á suðvestanverðu landinu, suðaustan 10-18 m/s þar og gul viðvörun vegna vinds tekur gildi kl. 21:00 á Suðurlandi og miðhálendinu fram á aðfaranótt laugardags. Þetta eru varasamar aðstæður fyrir ökutæki sem taka á sig mikinn vind og tjöld geta fokið. Einnig er útlit fyrir talsverða úrkomu sunnan- og suðaustantil á landinu fram á laugardagsmorgun.
Laugardagur 2. ágúst
Á laugardag er útlit fyrir suðlæga átt, 8-15 m/s og rigningu með köflum, en síðdegis hvessir heldur vestanlands. Bjart með köflum á Norðausturlandi og dregur smám saman úr vindi austanlands þegar líður á daginn.
Sunnudagur 3. ágúst
Á sunnudag er útlit fyrir suðvestan 5-13 m/s og skúrir, en áfram bjartara norðaustantil. Hægari og úrkomuminna á sunnudagskvöld. Hiti yfirleitt á bilinu 10 til 20 stig, hlýjast á Norðausturlandi.