Ferðafélag Íslands, Útivist og Björgunarsveitin Dagrenning á Hvolsvelli vara fólk eindregið við því að leggja af stað í göngu yfir Fimmvörðuháls, þar sem aðstæður eru nú hættulegar.
Undanfarin ár hefur jökullinn verið að hopa og í kjölfarið hafa gil og sprungur opnast. Á hluta leiðarinnar milli Baldvinsskála og Fimmvörðuhálsskála hafa einnig myndast brattar brekkur og skriður þar sem áður var snjór eða jökulís. Eftir mikla rigningu síðustu daga hefur snjó tekið upp og leiðin er ófær yfir gil og vatnssvelgi.
FÍ, Útivist og Dagrenning vilja því eindregið vara fólk við því að leggja af stað í göngu yfir Fimmvörðuháls eins og aðstæður eru í dag.
Í tilkynningu segir að það sé sameiginlegt verkefni þeirra sem koma gönguleiðinni að finna nýja og öruggari leið á þeim hluta gönguleiðarinnar þar sem hættulegar aðstæður hafa skapast vegna hops jökulsins.