Almannavarnadeild ríkislögreglustjóra telur ástæðu til að vara við umferð um suðausturhluta Mýrdalsjökuls vegna sprungumyndunar umhverfis sigkatlana sem þar hafa myndast.
Í gær, mánudaginn 18. júlí, fóru vísindamenn í þyrluflug með Landhelgisgæslunni yfir Vatnajökul og Mýrdalsjökul.
Markmið flugsins var þríþætt. Farið var með GPS mæli á Vatnajökul nálægt Hamrinum til að fylgjast nánar með hreyfingum á jöklinum, en í síðasta vísindaflugi kom fram að þar hafði myndast nýtt jarðhitasvæði. Þá var flogið yfir Mýrdalsjökul til að fylgjast með sigkötlum sem mynduðust í hlaupinu 9. júlí síðastliðinn auk þess sem skoðað var hvort breytingar væru á yfirborði jökulsins eftir jarðskjálftann í fyrrinótt, sem mældist 3,8 á Richter.
Lítilsháttar breytingar hafa orðið á sigkötlunum í Mýrdalsjökli frá síðasta vísindaflugi sem farið var 16. júlí auk þess sem leysingavatn hefur safnast fyrir. Ekki var að sjá neinar breytingar á yfirborði Mýrdalsjökuls eftir jarðskjálftann.
Áfram verður fylgst náið með þessum svæðum.