Varað við stormi í kvöld

Búist er við suðaustan stormi eða roki (20-28 m/s) suðvestan- og vestanlands í kvöld með snjókomu eða slyddu. Búast má við miklum vindhviðum við fjöll (40-50 m/s).

Þessu fylgir talsverð úrkoma sunnan- og vestanlands og jafnvel mikil á SA-landi.

Fólki er bent á að festa lausa hluti sem og fresta ferðalögum þar til veðrið er gengið yfir. Í tilkynningu frá Sjóvá segir að það hafi sýnt sig í óveðrinu í síðustu viku að ekki var vanþörf á að minna almenning á slíkt.

Það spáir einnig hlýnandi veðri í kvöld og við slíkar aðstæður þá eykst hættan á vatnstjóni vegna stíflaðra niðurfalla, þakrenna eða snjó við innganga kjallara. Oftar en ekki er um að ræða tjón sem ekki er hægt að bæta úr tryggingum. Það skiptir því miklu máli að grípa til fyrirbyggjandi aðgerða. Besta leiðin til þess að fyrirbyggja slík tjón er að tryggja að niðurföll og þakrennur virki sem skyldi. Sjóvá beinir tilmælum til húseigenda að hreinsa vel frá niðurföllum í dag svo að snjór, klaki eða óhreinindi stífli þau ekki og moka vel frá inngangi kjallara.

Hvað getur þú gert?

  • Hreinsaðu klaka, snjó, sand og lauf frá niðurföllum og þakrennum. Þau verða að virka þegar snjór og klaki bráðnar hratt og mikill vatnselgur myndast.
  • Brjótið klaka frá niðurföllum í götu og í innkeyrslu og mokið snjó frá.
  • Hreinsaðu snjó og klaka af svölum en gættu að bílum og gangandi vegfarendum.
  • Við inngang í kjallara og við glugga eða veggi á neðri hæð gæti þurft að moka frá snjó.