Varað við flóðum og skriðuföllum

Búist er við miklu vatnsveðri á öllu sunnan- og vestanverðu landinu í nótt, á morgun, miðvikudag og fyrrihluta fimmtudags, meira en 100 mm á sólarhring. Mest verður úrkomuákefðin í nótt og á morgun.

Flóðahætta getur því skapast mjög víða á svæðinu strax í nótt t.d. á vatnasviði Hvítár í Árnessýslu og við Ölfusá. Viðbúið er að mikið vaxi í ám og lækjum og er fólki eindregið ráðlagt frá því að reyna að fara yfir órbrúaðar ár og læki. Jafnframt má búast við aukinni hættu á skriðuföllum á þessum slóðum.

Ásamt úrkomunni er búist við miklu afrennsli af jöklum. Því má búast við miklum vatnavöxtum í kjölfarið og þar sem mikið hefur rignt undanfarið er vatnsstaða víða há.

Í þéttbýli mun mikið reyna á frárennslismannvirki og því mikilvægt að þau virki sem skildi. Ráðlegt er að hreinsa vel frá niðurföllum og grípa til annarra aðgerða sem þurfa þykir.

Langvarandi úrkomuatburðir sem þessir eru mjög sjaldgæfir og aðstæður og afleiðingar því ókunnuglegar og jafnvel hættulegar, segir í tilkynningu frá Almannavörnum.