Valdís Una Guðmannsdóttir, körfuknattleikskona hjá Körfuknattleiksfélagi Selfoss, var valin íþróttamaður ársins 2025 í Hrunamannahreppi.
Auk Valdísar Unu var Emma Rún Sigurðardóttir, Hestamannafélaginu Jökli, tilnefnd til verðlaunanna.
Valdís Una er uppalin hjá Ungmennafélagi Hrunamanna en árið 2021 gekk hún í raðir Hamars/Þórs. Hún var síðan ein af stofnendum kvennaliðs Selfoss í körfubolta og hefur síðan verið í lykilhlutverki hjá liðinu sem leikur í 1. deildinni.
Emma Rún náði góðum árangri á keppnisvellinum árið 2025. Hún komst í A-úrslit í ellefu skipti, sem endurspeglar bæði áræðni og góða frammistöðu yfir tímabilið.
Viðurkenningar fyrir afrek á sviði íþrótta á árinu 2025 voru afhentar á hátíðardagskrá Hrunamanna þann 17. júní 2026 af formanni Lýðheilsu- og æskulýðsnefndar Hrunamannahrepps, Elísabetu Finnbjörnsdóttur.