Í Bókasafni Árborgar á Selfossi hefur verið sett upp svokölluð útifataskiptislá. Er þetta í fyrsta sinn sem bókasafnið setur upp skiptislá fyrir útiföt en áður hefur bókasafnið boðið upp á skiptislá fyrir spariföt og hrekkjavöku- og öskudagsbúninga.
Fyrirkomulagið er einfalt. Fólk getur komið með útiföt og sett á slánna eða tekið útiföt af henni. Ekki er nauðsynlegt að koma með föt til að geta tekið af slánni.
„Svona skiptislár hafa oft verið í gangi í bókasöfnum og skemmst er að minnast þess að við settum upp sparifataslá fyrir síðustu jól sem var gífurlega mikil umferð um. Við höfum líka verið með öskudagsbúningaslár undanfarin ár sem hafa verið vel nýttar,“ segir Heiðrún Dóra Eyvindardóttir, forstöðumaður Bókasafns Árborgar, í samtali við sunnlenska.is.
„Útifatasláin kom upp núna í september og verður trúlega uppi fram til sirka 15. október. Hún fór hægt af stað en núna er orðin talsverð umferð um hana. Akkúrat í dag er mest af fötum fyrir yngri deildina, það er leikskólabörnin. Endilega nýtið ykkur slárnar hvort sem er til að gefa eða þiggja. Svo setjum við hrekkjavökubúninga á slá næst,“ segir Heiðrún Dóra ennfremur.