Fjármálaeftirlitið (FME) hefur tekið ákvörðun um samruna Landsbankans og Sparisjóðs Vestmannaeyja, frá og með deginum í dag.
Starfsemi útibúa Sparisjóðs Vestmannaeyja verður óbreytt fyrst um sinn og útibúið á Selfossi mun opna á hefðbundnum tíma í fyrramálið. Það verður hins vegar sameinað útibúi Landsbankans á Selfossi fljótlega en allir starfsmenn Sparisjóðsins eru nú orðnir starfsmenn Landsbankans.
Sparisjóður Vestmannaeyja hefur um nokkurt skeið ekki uppfyllt lögbundnar kröfur um eigið fé og þurfti því að finna lausnir á fjárhagsvanda sínum. Stjórn sparisjóðsins leitaði því til Landsbankans eftir að aðrar tilraunir til að endurreisa sjóðinn báru ekki árangur.
Í framhaldi komust stjórn sparisjóðsins og Landsbankinn að samkomulagi um samruna félaganna.
Sparisjóður Vestmannaeyja er með starfsstöðvar á fimm stöðum á landinu: Í Vestmannaeyjum, á Selfossi, Höfn, Breiðdalsvík og Djúpavogi. Landsbankinn rekur útibú á Selfossi og Höfn og þar verða útibú sameinuð fljótlega.
Lögð verður áhersla á að samruninn efli þjónustu við viðskiptavini og samskipti þeirra við bankann. Öll útibú sparisjóðsins opna á venjubundnum tíma á mánudag og viðskiptavinir geta snúið sér til sinna þjónustufulltrúa að venju. Fyrst um sinn munu reikningar og reikningsnúmer haldast óbreytt.