Karlmaður var í morgun úrskurðaður í gæsluvarðhald í Héraðsdómi Suðurlands til fimmtudagsins 8. nóvember vegna rannsóknar á líkamsárás sem átti sér stað í heimahúsi í Þorlákshöfn síðastliðinn sunnudag.
Maðurinn, sem er fæddur 1959, er talinn hafa veitt konu á fimmtugsaldri stunguáverka á kvið með hnífi. Konan var flutt af vettvangi á sjúkrahús, með sjúkrabifreið, þar sem hún dvelur enn en er ekki talin í lífshættu.
Báðir aðilar eru af erlendu bergi brotnir en hafa verið búsettir hér og unnið um lengri tíma.
Gæsluvarðhaldsúrskurðurinn rennur út kl. 18:00 á fimmtudaginn.
Lögreglan á Suðurlandi mun ekki veita frekari upplýsingar um málið að sinni.