Í gær voru Björgunarsveitin Dagrenning á Hvolsvelli og Flugbjörgunarsveitin Hellu boðaðar út vegna mæðgina á húsbíl sem urðu innlyksa í Landmannalaugum sökum færðar.
Þau höfðu lagt leið sína inn í Landmannalaugar á laugardag í skínandi veðri og alauðu, en þegar þau vöknuðu í gærmorgun hafði umhverfið breyst talsvert, allt á kafi í snjó og þau komust hvergi.
Björgunarsveitirnar fóru inn í Landmannalaugar á tveimur bílum til að aðstoða ferðalangana til byggða. Um tíma leit út fyrir að skilja yrði húsbílinn eftir, en svo reyndist unnt að draga hann niður að Sigölduvirkjun, þar sem færðin var orðin skapleg.
Á Frostastaðahálsi keyrðu svo björgunarsveitir fram á annan ferðalang á jeppa sem hafði fest sig í snjó og var hann einnig aðstoðaður.
Þegar komið var til baka niður í Hrauneyjar, mættu björgunarsveitir nokkrum öðrum ferðalöngum á jepplingi sem ætluðu inn í Landmannalaugar, en var gert ljóst að þangað kæmust þau ekki á þeim bíl og snéru því við. Frá Hrauneyjum gat svo ferðafólkið á húsbílnum haldið för sinni áfram óstutt.