Síðastliðinn fimmtudag lauk samsetningu vindmyllu númer 14 í Vaðölduveri. Þar með eru allar þær 14 vindmyllur sem áætlað var að reisa í ár komnar upp.
Flutningar á vindmylluhlutum frá Þorlákshöfn hófust aðfaranótt 7. maí og samsetning fyrstu vindmyllunnar hófst 22. maí. Uppsetningarvinnan hefur gengið vel, að því er fram kemur í tilkynningu frá Landsvirkjun, þó að aðstæður hafi stundum verið krefjandi, ekki síst þegar vindur hefur sett strik í reikninginn við hífingar. Öryggi hefur ávallt verið í fyrirrúmi og vinnu hagað eftir aðstæðum hverju sinni.
Næst tekur við undirbúningur fyrir gangsetningu vindmyllanna, prófanir og frágangur búnaðar. Jafnframt heldur vinna áfram við safnstöð og aðra innviði á svæðinu.
Á næsta ári bætast svo aðrar 14 vindmyllur við og verða þá alls 28 myllur í Vaðölduveri.