Upprennandi rithöfundar í ML

Bandaríski rithöfundurinn Alyssa Hattman heimsótti Menntaskólann að Laugarvatni á dögunum og kenndi 3. bekkingum ritun smásagna og leiftursagna.

Það voru nemendur í áfanganum Yndislestri og skapandi skrifum sem hittu Hattman og féll kennsla hennar í frjóan jarðveg og ýmsir upprennandi rithöfundar og jafnvel stórskáld litu dagsins ljós.

Elín Una Jónsdóttir, íslenskukennari, mun svo taka upp þráðinn þar sem Hattman hvarf frá honum og halda áfram að hvetja nemendur til skapandi skrifa í vetur.

Smásögur Alyssa Hattman hafa birst í bandarískum tímaritum og hefur hún hlotið verðlaun fyrir skrif sín. Hún er menntuð í bókmenntum og skapandi skrifum og kennir við Chemeketa háskólann í Oregon. Hún hefur dvalið við skriftir á Laugarvatni að undanförnu á vegum Gullkistunnar.