Uniconta og TRS á Selfossi hafa hafið samstarf en TRS getur nú boðið viðskiptavinum sínum fullkomið bókhaldskerfi gegn föstu lágu áskriftargjaldi.
„Samfara skýjavæðingu upplýsingatækninnar standa flest fyrirtæki frammi fyrir því að þurfa að uppfæra bókhaldskerfin á næstu misserum og það er okkur sönn ánægja að geta boðið viðskiptavinum okkar fullkomið bókhaldskerfi í skýinu gegn föstu lágu áskriftargjaldi“, segir Gunnar Bragi Þorsteinsson framkvæmdastjóri TRS.
Ingvaldur Thor Einarsson, framkvæmdastjóri Uniconta á Íslandi, segir mikinn feng fyrir Uniconta að fá TRS til samstarfs, en TRS er leiðandi fyrirtæki í upplýsingatækni. „Við teljum að samstarfið verði báðum fyrirtækjum og viðskiptavinum þeirra til mikilla heilla“, segir Ingvaldur.
Uniconta er nýjasta bókhaldskerfið úr smiðju Erik Damgaard sem leiddi hönnun heimsþekktra lausna eins og Dynamics Ax og Concorde XAL. Uniconta fellur vel að þörfum smærri fyrirtækja og býður upp fjárhags-, birgða og verkbókhald, CRM og einfaldar tengingar við önnur kerfi. Öll gögn eru vistuð í öruggu umhverfi í skýinu og notendur vinna í biðlara á tölvu eða snjalltæki.
Uniconta var hleypt af stokkunum á Íslandi í október síðastliðnum og síðan þá hefur fjöldi notenda vaxið dag frá degi.
TRS var stofnað árið 1995 og hefur frá upphafi þjónað einstaklingum, fyrirtækjum og stofnunum með tölvu- og fjarskiptabúnað. Fjöldi starfsmanna TRS hefur vaxið ár frá ári og starfa nú 26 manns hjá fyrirtækinu.