Ungmennafélagið fékk menningarverðlaunin

„Verðlaunin komu að þessu sinni í hlut Ungmennafélags Biskupstungna fyrir að standa að útgáfu Litla-Bergþórs í 35 ár og útgáfu á sögu félagsins „Ungmennafélag Biskupstungna – 100 ára saga”.

Þetta segir Helgi Kjartansson, oddviti Bláskógabyggðar en menningarverðlaun sveitarfélagsins voru afhent í fyrsta skipti á jólamarkaði Kvenfélags Laugdæla á dögunum.

Það voru þau Smári Þorsteinsson, formaður Umf. Bisk., og Svava Theodórsdóttir, fulltrúi ritnefndar Litla-Bergþórs, sem tóku við verðlaununum úr hendi Sigríðar Jónsdóttur fulltrúa menningarmálanefndar, sem hafði veg og vanda að verðlaunaafhendingunni.