Ungir drengir unnu talsvert tjón með skemmdarverkum

Þrír drengir, níu til tólf ára, unnu talsvert tjón á verkstæði smíðaverktaka á Selfossi í gærkvöldi eftir að hafa brotið sér leið inn á verkstæðið.

Drengirnir skemmdu verkfæri, efni og fleira. Þeir settu einnig lyftara í gang og óku honum á bifreið sem var inni á verkstæðinu.

Forráðamenn drengjanna voru kallaðir til ásamt barnaverndaryfirvöldum sem fóru yfir málið með lögreglu.

Í dagbók lögreglunnar á Suðurlandi segir að ljóst sé að fjárhagslegt tjón vegna skemmdarverkanna sé talsvert.