Undirskriftalistarnir frá undirskriftasöfnuninni í vor varðandi ósk um íbúakosningu um nýja aðal- og deiliskipulagið fyrir miðbæ Selfoss voru afhentir fulltrúa Sveitarfélagsins Árborgar í dag, föstudag.
Með undirskriftalistunum fylgdi leiðbeinandi umsögn Persónuverndar varðandi meðhöndlun sveitarstjórnar á slíkum listum.
„Þess var óskað vegna yfirlýsingar fyrrverandi framkvæmdastjóra bæjarins um að birta þessa lista opinberlega. Óskin um slíka leiðbeiningu var send á Persónuvernd þann 10. maí síðastliðinn en svar Persónuverndar barst ekki fyrr en 14. ágúst,“ segir Aldís Sigfúsdóttir, ein af ábyrgðarmönnum undirskriftarsöfnunarinnar.
Í svari Persónuverndar kemur m.a. fram að ekki er heimild í lögum til að birta þessa lista opinberlega, gæta þarf meðalhófs við vinnslu gagnanna og virða einkalífsrétt þeirra sem skráðir eru.
Að sögn Aldísar hafa undirskriftalistarnir verið í vörslu Þjóðskrár Íslands frá því að þjóðskrá fékk þá í hendurnar í vor og voru þeir sóttir í gær og geymsluboxin innsigluð af Lögreglunni á Suðurlandi.
„Þá er rétt að minna á það að eftir að Þjóðskrá Íslands hafði lokið úrvinnslu sinni á fjölda undirskrifta í vor þá sendi hún tölvupóst með staðfestingu á gildandi undirskrift á undirskriftalistunum sem nálgast má á vefsíðu Þjóðskrár Íslands Ísland.is, undir mínar síður,“ bætir Aldís við.
Auk Aldísar eru ábyrgðarmenn undirskriftasöfnunarinnar þeir Davíð Kristjánsson og Gísli Ragnar Kristjánsson.