Viljayfirlýsing innviðararáðherra og Ganga og brúar ohf. um uppbyggingu mikilvægra samgöngumannvirkja var undirrituð gær. Hún fjallar um uppbyggingu fimm stórra samgönguverkefna sem Göngum og brú er ætlað að fjármagna og koma í framkvæmd.
Áhersla hraðan framgang
Eyjólfur Ármannsson innviðaráðherra og Guðmundur Daði Rúnarsson forstjóri Ganga og brúar undirrituðu viljayfirlýsinguna á alþjóðlegum kynningarfundi sem innviðafélagið hélt í Hörpu í gær.
„Við erum að stíga annað mikilvægt skref úr þeirri kyrrstöðu sem hefur verið í stórum samgönguframkvæmdum allt of lengi. Innviðafélagið Göng og brú var stofnað í sumar til að fjármagna og tryggja hraðari framvindu framkvæmda. Markmiðið er að félagið fái fyrsta verkefnið í hendurnar fyrir árslok,“ segir Eyjólfur.
Fimm stór verkefni til Ganga og brúar
Á grundvelli viljayfirlýsingarinnar verður gengið verður til samninga um aðkomu Ganga og brúar að fimm stórum samgönguverkefnum, meðal annars nýju brúarinnar yfir Ölfusá. Hin verkefnin eru brúin yfir Hornafjarðarfljót, Fljótagöng, Sundbraut og tvöföldun Hvalfjarðarganga.
Samkvæmt lögum um innviðarfélagið og vegalög er innviðaráðherra heimilt að gera samninga við félagið um uppbyggingu og rekstur samgönguverkefna á grundvelli samgönguáætlunar í samræmi við tilgang og hlutverk félagsins. Stefnt er að því fyrstu samningar innviðaráðherra við félagið verði gerðir fyrir áramót og næstu samningar á fyrri hluta næsta árs.
Staða og eðli verkefnanna er ólík og því mun aðkoma innviðafélagsins og útfærsla verða ákvörðuð í samningi fyrir hvert verkefni. Í öllum verkefnum er þó miðað við vegfarendur greiði gjald til Ganga og brúar fyrir notkun sína í samræmi við gjaldskrá.
„Þetta eru fyrstu verkefnin sem okkur verður falið og við hlökkum til að koma þeim í framkvæmd. Við munum byggja okkar vinnu á vönduðum undirbúningi, hagkvæmri fjármögnun og skilvirkri framkvæmd. Við munum ganga beint til verks,“ segir Guðmundur Daði.