Heilbrigðisnefnd Suðurlands hefur ákveðið að hefja nauðsynlegan undirbúning vegna þeirra breytinga sem verða á fyrirkomulagi heilbrigðiseftirlita sveitarfélaga um næstu áramót.
Eins og sunnlenska.is hefur greint frá verður til ný ríkisstofnun um áramótin, Stofnun atvinnuveganna, sem mun sinna þeim verkefnum sem áður voru hjá Matvælastofnun, Fiskistofu og Verðlagsstofu skiptaverðs, auk verkefni heilbrigðiseftirlitsins munu færast til hinnar nýju stofnunar.
Í ljósi þess hefur Heilbrigðisnefnd Suðurlands falið framkvæmdastjóra Heilbrigðiseftirlits Suðurlands að hefja formlegt ferli vegna starfsloka starfsfólks og uppsagnar á leiguhúsnæði embættisins auk þess sem formanni nefndarinnar var falið að segja framkvæmdastjóra upp störfum með sama hætti.
Heilbrigðiseftirlit Suðurlands er byggðasamlag sveitarfélaga á Suðurlandi og hefur um langt skeið sinnt mikilvægum verkefnum á sviði heilbrigðiseftirlits, hollustuhátta, mengunarvarna og matvælaeftirlits á starfssvæði sínu.
Mikilvægt að ríkið nýti mannauð og staðarþekkingu á Suðurlandi
„Heilbrigðisnefnd leggur ríka áherslu á að vel verði staðið að þessum umfangsmiklu breytingum og að hagsmunir starfsfólks verði hafðir að leiðarljósi í því ferli sem nú tekur við. Starfsfólk Heilbrigðiseftirlits Suðurlands býr yfir mikilli reynslu og sérþekkingu sem hefur byggst upp á löngum tíma og nefndin telur mikilvægt að sú þekking nýtist áfram við eftirlit og þjónustu á Suðurlandi,“ segir í tilkynningu frá Heilbrigðisnefnd Suðurlands, þar sem framkvæmdastjóra og starfsfólki Heilbrigðiseftirlits Suðurlands eru færðar innilegar þakkir fyrir þeirra mikilvæga og faglega starf í þágu íbúa, sveitarfélaga og atvinnulífs á Suðurlandi.
Stjórn Samtaka sunnlenskra sveitarfélaga hefur fundað vegna málsins og ítrekar í bókun mikilvægi þess að faglega sé staðið að umskiptunum gagnvart starfsfólki. Stjórn SASS leggur áherslu á að ríkið nýti sér þann mikla mannauð og staðarþekkingu sem þegar er til staðar á Suðurlandi við uppbyggingu á nýju eftirlitskerfi.