Eigna- og veitunefnd Árborgar hefur falið mannvirkja- og umhverfissviði sveitarfélagsins að setja af stað vinnu við undirbúning hönnunar kennslusundlaugar við Sunnulækjarskóla á Selfossi.
Verkefnið er á fjárfestingaráætlun sveitarfélagsins 2021-2024 en vinnunni sem nú fer af stað á að vera lokið næsta vetur, fyrir fjárhagsáætlunargerð ársins 2022.
Nemendum Sunnulækjarskóla er ekið í sundkennslu í Sundhöll Selfoss en allt frá því skólahúsnæðið var hannað á sínum tíma var gert ráð fyrir kennslusundlaug í álmu vestast í byggingunni.
„Mjög líklega verður um að ræða 25 metra kennslusundlaug. Í fyrsta kasti er hugsunin sú að hún verði eingöngu notuð sem kennslusundlaug og að íþróttir fatlaðra myndu svo færast með sína aðstöðu í húsið með tíð og tíma þ.e. í fimleikasalinn og sundlaugina. Við erum að fara af stað með þarfagreiningarvinnu og sjáum til hvað kemur út úr henni,“ sagði Tómas Ellert Tómasson, formaður eigna- og veitunefndar, í samtali við sunnlenska.is.
Upphaflegar teikningar gerðu ráð fyrir sundlaug á 2. hæð hússins en Tómas Ellert segir að öllum líkindum verði fallið frá þeirri hönnun.
„Væntanlega verður sundlaugin á jarðhæð. Rýmið fyrir búningsklefana sem voru ætlaðir fyrir laugina á 2. hæð eru núna æfingasalur taekwondodeildar Umf. Selfoss og verður það áfram, þannig að það þarf að endurhanna þennan hluta hússins,“ segir Tómas Ellert ennfremur.