Fjórtán ökumenn voru stöðvaðir í umdæmi lögreglunnar á Suðurlandi, fyrir að aka of hratt í liðinni viku. Flestir þeirra voru erlendir ferðamenn og sá er hraðast ók mældist á 130 km/klst hraða þar sem leyfður hámarkshraði er 90 km/klst.
Sektin var 120 þúsund krónur og greidd á staðnum, líkt og flestir þeir sem stöðvaðir voru kusu að gera enda er veittur 25% afsláttur ef greitt er innan 30 daga frá álagningu sektarinnar.
Þá voru fjórir ökumenn kærðir fyrir að nota farsíma án handfrjáls búnaðar við akstur bifreiða sinna í vikunni og skráningarnúmer voru tekin af einni bifreið sem reyndist ótryggð í umferð.
Þrír ökumenn voru stöðvaðir vegna gruns um akstur undir áhrifum fíkniefna. Einn þeirra var á bíl með stolnum númeraplötum og með barn sitt í bílnum.