Umhverfisnefnd Hrunamannahrepps afhenti umhverfshrós og umhverfisverðlaun Hrunamannahrepps við hátíðarhöldin á 17. júní.
Umhverfishrós Hrunamannahrepps 2025 hlýtur Vínbúðin á Flúðum. Í gegnum árin hefur umhverfi búðarinnar verið snyrtilegt og vel við haldið. Falleg beð taka á móti viðskiptavinum og gestum sem oft á tíðum nýta bekkinn fyrir framan búðina til að slaka á og njóta. Starfsfólk leggur metnað í að viðhalda fallegu umhverfi og að hafa almenna ásýnd búðarinnar til fyrirmyndar.
Umhverfisverðlaun Hrunamannhrepps 2025 hlýtur Kolbrún Kristín Daníelsdóttir. Stína, eins og hún er kölluð, hefur lagt metnað í að búa til dásamlegan sælureit við húsið sitt að Ásastíg 5 með fallegum garði og fallegu húsi sem er vel haldið við. Allt umhverfi í kringum Stínu er til fyrirmyndar hvort sem er yfir hásumarið þegar allt er í blóma eða á veturna þegar sett eru upp jólaljós og skreytingar. Ekki bara hefur Stína lagt metnað sinn í að gera fallegt í sínu nánast umhverfi heldu hefur hún einnig lagt hönd á plóginn við að gera samfélagið fallegra.