Tvenn umhverfisverðlaun voru veitt í Hrunamannahreppi á dögunum en hefð er fyrir því að umhverfisnefnd sveitarfélagsins verðlauni fallegasta garðinn og veiti umhverfishrósið.
Umhverfisverðlaun Hrunamannahrepps árið 2026 hlutu Lára Hildur Þórsdóttir og Skúli Guðmundsson í Birtingaholti 3. Lára og Skúli hafa lagt metnað sinn í að skapa afar fallegt, snyrtilegt og heildstætt umhverfi í Birtingaholti. Garðurinn þeirra er bæði frumlegur og einstaklega vel hirtur og ber skýrt vitni um natni og umhyggju fyrir nærumhverfinu. Þá hafa þau einnig unnið markvisst að því að fegra bæjarstæðið með því að taka húsakostinn í gegn og mála allar byggingar í samræmdum stíl, sem gefur staðnum fallega og glæsilega heildarmynd.
Umhverfishrósið er veitt fyrir framúrskarandi vinnu að umhverfismálum og getur það hvort sem er verið í eigin garði eða með athyglisverðu starfi sem bætir umhverfi Hrunamanna. Að þessu sinni kom hrósið í hlut Péturs Axels Péturssonar og Steinunnar G. Kristinsdóttur í Miðhofi 11. Axel og Steinunn hafa undanfarin ár unnið af alúð að því að fegra garðinn sinn og skapa hlýlegt og fallegt umhverfi í kringum heimilið. Metnaður þeirra og ræktarsemi skilar sér sérstaklega vel yfir sumartímann þegar garðurinn stendur í fullum blóma og gleður bæði íbúa og gesti sveitarfélagsins.
Halldóra Hjörleifsdóttir, fráfarandi formaður Umhverfisnefndar, afhenti viðurkenningarnar á hátíðardagskránni þann 17. júní síðastliðinn.