Kjötmjöli verður dreift á um þúsund hektara uppgræðslusvæða á vegum Lands og skógar á þessu ári. Mjölinu er meðal annars dreift á ungar birkigróðursetningar til að örva vöxt og flýta fyrir sjálfsáningu birkis.
Land og skógur hefur á undanförnum árum lagt aukna áherslu á nýtingu á lífrænum áburði til uppgræðslu. Þetta árið hefur verið samið um kaup á 1.500 tonnum af kjötmjöli frá Orkugerðinni í Flóahreppi og verður því dreift á um 1.000 hektara, bæði norðan- og sunnanlands. Þetta er fyrsta árið sem kjötmjöl er flutt norður í umtalsverðu magni.
Frá þessu er greint á heimasíðu Lands og skógar og þar segir Garðar Þorfinnsson, sérfræðingur hjá stofnuninni, að af dreifingunni sé tvennur ávinningur. Annars vegar verða trén hraustari og kraftmeiri og þar með líklegri til að fara snemma að bera ríkulegt fræ og sá sér út. Hins vegar styrkjast svæðin í kring og verða frjósamara set fyrir birkifræið til að spíra í.
Land og skógur keypti í vor nýjan og stærri dreifara og stenst hann allar væntingar, taki rúmlega einu tonni meira en þeir eldri og stjórnist af ökuhraða dráttarvélarinnar sem gerir að verkum að efnist dreifist jafnt og nýtist betur, auk þess sem afköstin við dreifinguna verði umtalsvert meiri.
Kjötmjöl er innlendur lífrænn áburður og með dreifingu þess myndast tiltölulega fljótt gróður- og jarðvegsskán á örfoka landi sem heldur í sér raka og gerir ýmiss konar gróðri kleift að koma sér þar fyrir, meðal annars birkinu.