Fyrsti rampurinn í átakinu Römpum upp Ísland var vígður við hátíðlega athöfn við Matkrána í Hveragerði í gær. Þetta er fyrsti rampurinn af 1.000 sem stefnt er að því að koma upp víðs vegar um land á næstu fjórum árum.
Ramparnir eru ætlaðir til að veita hreyfihömluðum aukið aðgengi að verslun og þjónustu en stofnaður var sjóður með aðkomu fyrirtækja og aðila sem munu standa straum af kostnaði fyrir þá verslunar- og veitingahúsaeigendur sem taka þátt í verkefninu.
Nú þegar eru komnir fimm rampar í Hveragerði og verkinu verður haldið áfram á næstu dögum, meðal annars í Reykjanesbæ og Árborg. Það var góð stemning við Matkrána í blíðunni í gær. Kristján Birgisson klippti á borða og vígði rampinn og Magnús Þór Sigmundsson gladdi gesti með tónlistarflutningi.
Um einstakt átak að ræða
„Það er mér, fyrir hönd Hvergerðinga, mikið gleðiefni að fyrsti rampurinn í átakinu Römpum upp Ísland skuli vera settur upp hér í Hveragerði. Hér er um einstakt átak að ræða sem sýnir djúpan skilning á þeim aðstæðum sem hreyfihamlaðir búa við. Það er afar mikilvægt að við í sameiningu reynum að útrýma öllum þeim hindrunum sem komið geta í veg fyrir að þeir sem bundnir eru við hjólastól geti notið aðgangs að sömu stöðum og þeir sem búa ekki við skerta getu hvað þetta varðar,“ sagði Aldís Hafsteinsdóttir, bæjarstjóri Hveragerðisbæjar. Þetta var síðasta embættisverk Aldísar sem bæjarstjóri í Hveragerði og hvatti hún forsvarsmenn átaksins til þess að koma við í Hrunamannahreppi, þar sem hún er að taka við sem sveitarstjóri.
Aðdáunarvert í alla staði
Í fyrra voru settir upp 100 rampar í miðborg Reykjavíkur í gegnum verkefnið Römpum upp Reykjavík. Gekk verkefnið vonum framar en smíði á römpunum lauk þremur mánuðum á undan áætlun og undir kostnaðaráætlun.
„Þetta er auðvitað aðdáunarvert í alla staði. Við sáum það að mikill áhugi var fyrir römpunum í Reykjavík og því ekki óeðlilegt að það smiti út frá sér til annarra sveitarfélaga. Ég á ekki von á öðru en að vel verði tekið í verkefnið um allt land og ég hlakka til þess að veita því brautargengi í framtíðinni,“ sagði Sigurður Ingi Jóhannsson, innviðaráðherra.
Þúsund rampar á fjórum árum
Römpum upp Ísland er verkefni sem miðaði að því að setja upp 1.000 rampa á næstu 4 árum. Stofnaður var sjóður með aðkomu fjölmargra fyrirtækja og aðila sem munu standa straum af kostnaði fyrir þá verslunar- og veitingahúsaeigendur sem taka þátt í verkefninu. Með römpunum er öllum gert kleift að sækja veitingastaði og verslanir þátttakenda á landinu öllu. Unnið verður í góðu samstarfi við eigendur viðkomandi bygginga og skipulagsyfirvalda. Haraldur Þorleifsson, stjórnandi hjá Twitter og stofnandi hönnunarfyrirtækisins Ueno, er hvatamaður verkefnisins.
Hægt er að kynna sér verkefnið á vefsíðunni rampur.is.