Vegferð, félag áhugafólks um Reynisfjallsgöng hélt kynningarfund í Félagsheimilinu Leikskálum í Vík í Mýrdal síðastliðinn sunnudag. Um 50 manns sóttu fundinn.
Á fundinum kynnti Einar Kristján Jónsson, forsvarsmaður hópsins, hugmyndir um rannsóknir, fjármögnun og þróun verkefnisins. Í kjölfarið urðu umræður um umferðaröryggi, umhverfisáhrif og mögulegan ávinning fyrir íbúa og atvinnulíf á svæðinu.
Eftir fundinn hefur þróunaráætlun verkefnisins verið uppfærð þar sem meðal annars hefur bæst við umfjöllun um tengsl við aðalskipulag Mýrdalshrepps, möguleg áhrif á viðbragðstíma neyðarþjónustu, meðal annars að Reynisfjöru og hugmynd um niðurgrafinn vegstokk milli byggðar og fjöru við Vík.
Fyrsti áfangi og möguleg hlutafjárþátttaka
Vegferð óskar nú eftir að heyra frá einstaklingum og fyrirtækjum sem vilja kynna sér mögulega hlutafjárþátttöku í fyrirhuguðu þróunarfélagi.
Í tilkynningu frá Vegferð segir að stefnt sé að 25 milljóna króna upphafsfjármögnun til gagnaöflunar, gerðar rannsóknaráætlunar og undirbúnings samninga. Lagt er til að hver hlutur verði að nafnverði ein króna og kaupverð í fyrstu fjármögnunarumferð verði einnig ein króna á hlut. Þannig samsvari 25 milljóna króna hlutafjáröflun 25 milljónum hluta.
Fyrirhugað lágmarksframlag hvers hluthafa er 50.000 krónur, sem samsvarar 50.000 hlutum, með það að markmiði að auðvelda heimamönnum og öðrum áhugasömum þátttöku. Einnig verði hægt að leggja fram hærri fjárhæðir. Ekki er óskað eftir greiðslum á þessu stigi og Vegferð tekur fram að hlutafjárframlag verður áhættufé og getur tapast.
Áhugaskráning er óskuldbindandi
Áhugasamir geta sent nafn, netfang og þá fjárhæð sem þeir gætu hugsað sér að leggja fram á vegferdgong@gmail.com. Skráningin er óskuldbindandi og felur hvorki í sér greiðsluskyldu né kaup á hlutum. Á sama netfangi er hægt að óska eftir að fá uppfærða þróunaráætlun senda.
Vegferð óskar einnig eftir því að fólk sem vill leggja verkefninu lið með þekkingu, reynslu og tengslum, óháð fjárhagslegri þátttöku hafi samband. Markmiðið nú sé að skapa traustan grundvöll fyrir ákvörðun um framhald verkefnisins í samráði við Mýrdalshrepp, samgönguyfirvöld, Vegagerðina og aðra hagsmunaaðila.

