Slökkviliðsmenn hjá Brunavörnum Árnessýslu á Selfossi hafa verið kallaðir út tvisvar í dag, til að slökkva eld í saunaklefa og gömlum heyrúllum.
Fyrra útkallið barst á níunda tímanum í morgun eftir að eldur kom upp í saunaklefa sem stóð upp við íbúðarhús í búgarðabyggðinni í Byggðarhorni í Sandvíkurhreppi. Að sögn Lárusar Kristins Guðmundssonar, varaslökkviliðsstjóra, gekk slökkvistarf vel en litlu mátti muna að eldur færi í íbúðarhúsið sjálft.
Um klukkan 18 í kvöld var svo tilkynnt um eld í gróðri og gömlum heyrúllum við Rútsstaði við Gaulverjabæjarveg í Flóahreppi. Slökkviliðsmenn frá Selfoss fóru á vettvang og slökktu eldinn.
„Við viljum vekja sérstaka athygli á því að fólk fari gætilega með eld þegar aðstæður eru eins og í dag. Jarðvegurinn er mjög þurr og því er talsverð hætta er á gróðureldum um þessar mundir,“ segir Lárus í samtali við sunnlenska.is.
