Rólegt var í umdæmi lögreglunnar á Selfossi í nótt þrátt fyrir mikinn mannfjölda í Árnessýslu.
Tveir ökumenn voru teknir grunaðir um akstur undir áhrifum fíkniefna í Úthlíð. Annar þeirra var einnig undir áhrifum áfengis og var sviptur ökuleyfi til bráðabirgða.
Þá fundu leitahundar tollgæslunnar lítilræði af hassi í Úthlíð. Þar eru rúmlega þúsund manns samankomin á tjaldstæðinu en um helmingi fleiri eru á Flúðum. Þar fór allt vel fram fyrir utan minniháttar pústra.
Annars var nóttin tíðindalítil, einn lögreglumaður sinnti umferðareftirliti með þyrluáhöfn Landhelgisgæslunnar og voru allir ökumenn sem stöðvaðir voru með sitt á hreinu. Þó var einn tekinn fyrir ölvunarakstur í Veiðivötnum.