Tveir erlendir ferðamenn létust í umferðarslysinu á Þjóðvegi 1 við Skaftafell í morgun. Þeir voru úrskurðaðir látnir á vettvangi slyssins.
Neyðarlínan fékk tilkynningu alvarlegt umferðarslys klukkan 9:50 í morgun en tvær bifreiðar sem komu úr gagnstæðum áttum skullu saman.
Alls voru átta manns í bílunum tveimur og voru hinir sex fluttir með þyrlum til aðhlynningar á Landspítalann í Fossvogi.
Fjölmennt lið björgunarfólks frá sjúkraflutningum, slökkviliðum, björgunarsveitum og lögreglu var kallað út vegna slyssins. Vinna á vettvangi er langt komin, og rannsókn málsins er á frumstigi og í höndum lögreglunnar á Suðurlandi.
Þjóðvegi 1 hefur verið lokað á meðan aðgerðir standa yfir, en ekið er um hjáleið við Skaftafell.