Lögreglan á Suðurlandi svipti tvo ökumenn ökuréttindum á staðnum en þeir voru stöðvaðir eftir hraðakstur á Mýrdalssandi í gær.
Um var að ræða erlenda ferðamenn sem voru í samfloti á tveimur bifreiðum. Bílarnir mældust á 163 km/klst hraða. Farþegar úr bifreiðunum tóku við akstri þeirra en mennirnir missa bílprófið í tvo mánuði.
Alls voru ellefu ökumenn kærðir fyrir hraðakstur á Mýrdalssandi og í kringum Vík í Mýrdal í gær, þar af voru tveir bílar á yfir 140 km/klst hraða. Af þessum ellefu voru sex erlendir ferðamenn og fimm Íslendingar.
Þá ók einn ökumaður á 95 km/klst hraða í gegnum þorpið í Vík en þar er 50 km/klst hámarkshraði.
Samtals munu þessir ökumenn þurfa að greiða rúmlega eina milljón króna í sekt.
Lögreglan á Suðurlandi kærði tíu ökumenn fyrir hraðakstur annarsstaðar í umdæminu í gær, þannig að samtals var 21 ökumaður stöðvaður fyrir of hraðan akstur.