Tveir Ölfusingar eru í hópi tíu einstaklinga sem tilnefndir eru sem Framúrskarandi ungur Íslendingur 2022 en JCI Ísland mun afhenda verðlaunin á morgun, miðvikudag.
Þetta eru þeir Stefán Ólafur Stefánsson frá Öxnalæk og Daníel E. Arnarson frá Þorlákshöfn.
Stefán Ólafur er tilnefndur fyrir störf á sviði viðskipta, frumkvöðla og/eða hagfræði. Árið 2016 stofnaði hann ásamt öðrum fyrirtækið Ekki Gefast Upp! með það að markmiði að bjóða upp á líkamsrækt fyrir börn og ungmenni sem glíma við andlega vanlíðan s.s kvíða og þunglyndi. Stefán hefur starfað víða með ungu fólki og hafa málefni barna og ungmenna lengi verið honum hugleikin. Hann starfar einnig sem IPS atvinnulífstengill hjá VIRK Starfsendurhæfingarsjóð en áður starfaði hann lengi sem ráðgjafi á Barna- og Unglingageðdeild Landspítalans og sinnti þar bæði einstaklings og fjölskylduráðgjöf.
Daníel er tilnefndur fyrir framlag til barna, heimsfriðar og/eða mannréttinda. Hann hefur starfað ötullega að málum hinsegin fólks og hefur verið framkvæmdastjóri Samtakanna ‘78 frá árinu 2017. Daníel hefur verið mikið í stjórnmálum frá því að hann var 17 ára gamall og tekið þátt í öllum kosningum síðan 2009. Hann stofnaði meðal annars Ung vinstri græn á Suðurlandi og var formaður þess í tvö ár en hann var varaþingmaður Suðurkjördæmis 2017 og einnig varaþingmaður Reykjavíkurkjördæmis suður frá 2021. Í frítíma sínum leggur Daníel rækt við söng og stýrir vikulegum karaoke-kvöldum á hinsegin skemmtistaðnum Kiki-Queer Bar.
Verðlaunin Framúrskarandi ungir Íslendingar, sem veitt eru árlega af JCI Íslandi, eru fyrst og fremst hvatningarverðlaun til ungs fólks sem er að takast á við krefjandi og athyglisverð verkefni. Verðlaunin eru hvatning og viðurkenning fyrir ungt fólk sem kemur til með að hafa áhrif í framtíðinni.