Síðastliðinn föstudag fór Bleika boðið fram í áttunda sinn á Hótel Selfossi.
Það er Krabbameinsfélag Árnessýslu sem stendur fyrir viðburðinum og hefur Hótel Selfossi hýst viðburðinn og stutt dyggilega við félagið síðastliðin sjö ár.
Viðburðurinn er stærsti fjáröflunarviðburður félagsins og gefa allir sem að kvöldinu koma vinnu sína til styrktar félagsins. Nú mættu alls um þrjú hundruð manns og söfnuðust um tvær milljónir króna sem alfarið verða nýttar í þjónustu við félagsmenn. Hundrað og fimm fyrirtæki, einstaklingar og verslanir lögðu viðburðinum lið á einn eða annan hátt.
Spennufall, þakklæti og ánægja
Svanhildur Ólafsdóttir, formaður Krabbameinsfélags Árnessýslu, var að vonum ánægð með kvöldið þegar sunnlenska.is heyrði í henni.
„Tilfinningin að loknu Bleika boðinu er alltaf ákveðið spennufall en umfram allt þakklæti og ánægja. Við hófum undirbúning fyrir kvöldið með margra mánaða fyrirvara, settum okkur í samband við Hótelið í mars og ræddum við skemmtikrafta og aðra sem leggja kvöldinu lið. Planið lá fyrir undir lok ágúst en þá var Guðmunda, okkar öflugi fjáröflunarstjóri, einnig farin af stað að afla vinninga í happdrættið.“
„Fjöldi sjálfboðaliða úr félaginu leggur okkur svo lið á Bleika boðinu, ýmist með því að selja aðgangsmiða, selja happdrættismiða, taka á móti gestunum og ekki síst að aðstoða við frágang í lokin. Það er heilmikið að halda utan um öll smáatriði sem þurfa að ganga upp og skiptir þar mestu máli að við vinnum vel saman og treystum hvort öðru.“
Ólýsanleg tilfinning
Sem fyrr segir þá er þetta í áttunda sinn sem Krabbameinsfélag Árnessýslu heldur Bleika boðið.
„Það er eiginlega ólýsanlegt að standa síðan uppi á sviði og bjóða fólkið velkomið á Bleika boðið, ár eftir ár. Tilfinningin sem kemur yfir mig þegar ég horfi yfir salinn og sé þar saman komna stóra sem smáa vinahópa, fjölskyldur, vinnufélaga og félagsmenn okkar sem við höfum fengið að fylgjast með takast á við krabbamein, er þakklæti, stolt og auðmýkt.“
„Það skiptir miklu máli fyrir starfsemi félagsins að njóta svo öflugra styrkja en ég vil þó meina að Bleika boðið skipti miklu máli fyrir samfélagið í heild, að hafa vettvang sem þennan til að koma saman og gleðjast, styðja og styrkja hvort annað ekki síður en félagið.“
Einstakt að finna velviljann í samfélaginu
Svanhildur segir að stemningin hafi verið góð í vel skreyttum sal sem Tilefni.is sá um að gera bleikan og fallegan. „Veitingarnar voru að vanda girnilegar og bragðgóðar og fær starfsfólk og stjórnendur hótelsins margfaldar þakkir fyrir hjálpsemi og góða þjónustu.“
Veislustjóri kvöldsins var Gabríel Werner og sá hann, ásamt félagsmönnum, um að draga út rúmlega hundrað happdrættisvinninga sem voru hver öðrum glæsilegri. Happdrættisvinningar komu frá ýmsum fyrirtækjum og verslunum í samfélaginu og víðar en Svanhildur segir einstakt að finna velvilja til félagsins teygja sig langt út fyrir bæjarmörkin. Kappahl gaf fyrstu hundrað konunum og fimmtíu körlunum gjafapoka við komu á viðburðinn.
Gabríel hafði farið víða í samfélaginu dagana fyrir viðburðinn og setti saman myndband sem sýnir samstöðu og samhug gagnvart málstaðnum og starfsemi félagsins. Anna Margrét hjúkrunarfræðingur mætti á svið og hafði frá skemmtilegum sögum að segja af lífinu sem miðaldra kona.
Bland og vinir
Í fyrsta sinn steig heil hljómsveit á svið á Bleika boðinu. Strákarnir í Bland og Vinir mættu með allar sínar græjur og fengu auk þess búnað frá EB Hljóðkerfi til að bæta hljóðgæðin. Fullmönnuð hljómsveit var síðan toppuð með leynigest en tónlistarmaðurinn Hreimur Örn Heimisson steig á svið með hljómsveitinni sem spilaði hvern slagarann á fætur öðrum.
Gestir kvöldsins voru heilt yfir ánægðir með viðburðinn og margir hverjir hafa mætt á Bleika boðið á hverju ári.
„Krabbameinsfélag Árnessýslu sendir öllum innilegar þakkir fyrir góða samveru og gríðarlega góða samvinnu með hagsmuni félagsmanna og starfsemi félagsins að leiðarljósi,“ segir Svanhildur að lokum.