Tvær konur og ungabarn létust í slysinu

Tvær konur á fertugsaldri og tæplega ársgömul stúlka létust í umferðarslysinu á brúnni yfir Núpsvötn í gær.

Fólkið í bílnum er allt breskir ríkisborgarar, tveir bræður og fjölskyldur þeirra sem voru á ferðalagi um Ísland. Eiginkonur bræðranna létust í slysinu, önnur var fædd árið 1979 en hin 1981. Þá lést dóttir annarra hjónanna, fædd í janúar á þessu ári.

Tildrög slyssins eru til rannsóknar hjá lögreglu og rannsóknarnefnd samgönguslysa en samkvæmt upplýsingum frá lögreglunni liggur fyrir að bifreiðinni var ekið til austurs fram hjá myndavélum við Hvolsvöll snemma í gærmorgun. Bifreiðin virðist hafa snúist á brúnni með þeim afleiðingum að hún fór uppá vegrið brúarinnar, hægra megin, eftir því nokkra vegalengd og síðan útaf henni. Þar féll bíllinn niður á áraurana fyrir neðan brúna.

Landhelgisgæslan notaði þrjár vélar í útkallinu
Hægt reyndist að aka, eftir vegslóða austar á sandinum, að bifreiðinni og athafna sig með sjúkrabíla og tækjabúnað björgunaraðila við brúna. Eins og fram hefur komið voru björgunaraðgerðir umfangsmiklar og margir sem að þeim komu.

Tvær þyrlur Landhelgisgæslunnar lentu á vettvangi en gæslan mun hafa notað þriðju vélina til að leiðsegja þyrluflugmönnum á vettvang vegna þess hversu skyggni til flugs var slæmt sem og til að tryggja fjarskipti við vettvang.

Samvinna viðbragðsaðila stendur uppúr
Viðbragðsaðilar á leið á vettvang, bæði austan og vestan að tilkynntu um hálkubletti á leiðinni þangað en lögreglan biður þá sem mögulega hafa upplýsingar um slysið að hafa samband við sig í síma 444 2010, á Facebook eða í tölvupósti á netfanginu sudurland@logreglan.is.

Lögregla þakkar öllum þeim sem að aðgerðunum komu fyrir þeirra vinnu, stóra sem smáa. Í tilkynningu frá lögreglunni segir að samvinna viðbragðsaðila standi upp úr í þessu erfiða máli og ljóst að slagkrafturinn sé mikill þegar allir leggjast á eitt.