Tvær bækur frá bókaforlaginu Sæmundi á Selfossi hlutu í gær tilnefningar til verðlauna, annars vegar Íslensku bókmenntaverðlaunanna 2015 og hins vegar Íslensku þýðendaverðlaunanna.
Tilnefningarnar á Sæmundur bræðrum að þakka, þeim Stefánssonum Jóni Halli og Hermanni. Hermann er tilnefndur til Íslensku bókmenntaverðlaunanna í flokki fagurbókmennta fyrir skáldsöguna Leiðin út í heim sem er magnað og margslungið framhald af Palla sem var einn í heiminum.
Tilnefningarnar voru tilkynntar við hátíðlega athöfn á Kjarvalsstöðum í gær. Bókmenntaverðlaunin verða afhent á Bessastöðum um mánaðarmótin janúar/febrúar en þýðendaverðlaunin verða afhent á Gljúfrasteini á alþjóðlegum degi bókarinnar, þann 23. apríl næstkomandi.
„Gærdagurinn var afar stór dagur í sögu bókaforlagsins Sæmundar. Þá voru tvær bækur okkar tilnefndar til verðlauna sem er mikill heiður og mikill áfangi,“ segir á Facebooksíðu Sæmundar.