Tvær ungar stúlkur létust í slysinu

Tvær stúlkur, á fimmtánda og sextánda ári, létust í umferðarslysinu á Suðurlandsvegi í Skaftárhreppi í gær. Þær voru farþegar í bílnum og köstuðust út úr honum þegar bíllinn valt útfyrir veg.

Bíllinn valt nokkrar veltur og hafnaði á hvolfi utan vegar. Karli og konu, sem sátu í framsætum bílsins, var bjargað út úr honum í þann mund sem eldur kviknaði í bílnum. Þau voru flutt með þyrlum á slysadeild Landspítalans og eru nú á gjörgæsludeild, en ekki talin í lífshættu.

Vegfarendur hófu lífgunartilraunir á stúlkunum sem viðbragðsaðilar tóku síðan við, en þær voru úrskurðaðar látnar á vettvangi.

Fólkið er allt pólskir ríkisborgarar en stúlkurnar sem létust voru gestkomandi á Íslandi. Ekki er unnt að greina frá nöfnum hinna látnu að svo stöddu.

Mikill viðbúnaður var vegna slyssins. Lögreglumenn frá lögreglunni á Hvolsvelli, staðsettir á Kirkjubæjarklaustri, auk lögreglumanns frá rannsóknardeild lögreglunnar á Selfossi komu á vettvang ásamt sérfræðingi í bíltæknirannsóknum. Fulltrúi frá Rannsóknarnefnd umferðarslysa kom á vettvang. Einnig kom á vettvang slökkvilið frá Vík og Kirkjubæjarklaustri sem og sjúkrabílar frá Vík og Kirkjubæjarklaustri. Læknir frá Vík kom á staðinn auk þess sem björgunarsveitir í Skaftárhreppi aðstoðuðu við vinnu á vettvangi og við að loka umferð um Suðurlandsveg á meðan vinnu stóð. Umferð var beint um Meðallandsveg og Hrífunes á meðan lokunin stóð en vegurinn var opnaður um 18:30.

Rannsókn á tildrögum slyssins stendur yfir en rannsóknardeild lögreglunnar á Selfossi fer með hana í samvinnu við lögregluna á Hvolsvelli.