Tvær líkamsárásir um helgina

Ungur karlmaður var sleginn nokkrum hnefahöggum í höfuðið fyrir utan skemmtistaðinn Frón á Selfossi aðfaranótt laugardagsins.

Árásarþolinn rotaðist og var fluttur á heilsugæslustöðina á Selfossi. Skoðun læknis leiddi í ljós að maðurinn reyndist óbrotinn.

Þá gerðist það á Laugarvatni um helgina að ölvuð kona kastaði glasi í andlit karlmanns. Glasið brotnaði þegar það skall í andliti mannsins og hann skarst en hann taldi ekki ástæðu til að leita til læknis vegna þess.

Í dagbók lögreglu kemur fram að engu að síður flokkist árás af þessu tagi undir alvarlega líkamsárás þar sem hending ein ræður afleiðingum.