Trausti kynnir „Mótun framtíðar“

Trausti Valsson, skipulagsfræðingur, kynnir bók sína „Mótun framtíðar“ í Tryggvaskála á Selfossi laugardaginn 21. nóvember kl. 13:30.

Á fundinum mun Trausti kynna nýútkomna ævi- og starfssögu sína Mótun framtíðar. Trausti mun segja frá forfeðrum sínum í Hreppum og sýna myndir af þeim.

Hann mun síðan fjalla um strauma og stefnur sem ríkt hafa í arkitektúr, skipulagi og byggðamálum sl. 50 ár en um þetta hefur Trausti fjallað mikið sem kennari og prófessor við Háskólann í 27 ár.

Trausti er þekktur fyrir að hafa sett fram mjög frumlegar og djarfar hugmyndir, t.d. um flugvöll á Lönguskerjum, Sundabraut fyrir framan byggðina í NA-hluta Reykjavíkur. En einna þekktastur er hann fyrir hálendisvegi til að stytta verulega leiðir á milli landshluta þar á meðal hinar fornu leiðir um Sprengisand og Kjalveg. Trausti mun sérstaklega fjalla um mikilvægi Kjalvegar og sýna vídeómyndir máli sínu til stuðnings. Í tilkynningu frá Trausta segir að bættur Kjalvegur sé mjög mikilvægur fyrir aukið samstarf Sunnlendinga og Norðlendinga í framtíðinni og hafi mikla þýðingu fyrir íslenska sem erlenda ferðamenn.

Guðni Ágústsson, fyrrverandi alþingismaður og landbúnaðarráðherra, mun stýra fundinum.

Allir velkomnir.