Tombólan í Grímsnesi fellur niður í fyrsta skipti í 94 ár

Árleg tombóla Kvenfélags Grímsneshrepps verður ekki haldin í ár vegna aðstæðna í samfélaginu. Þetta er í fyrsta skipti síðan árið 1926 sem tombólan fellur niður en hana átti að halda í 95. skipti á Grímsævintýrum um aðra helgi.

„Á vormánuðum vorum við búnar að fara yfir allar áætlanir sem viðhafa þarf fyrir litlu sveitahátíðina okkar, Grímsævintýri, og einfalda okkur skipulagið þar sem tombólan átti að eiga sviðið í ár. Við viljum axla samfélagslega ábyrgð og standa ekki fyrir fjölmennum samkomum á tímum sem þessum og með því mögulega stuðla að hópsmitum,“ segir í tilkynningu frá Kvenfélagi Grímsneshrepps.

Skipulagið á tombólunni var langt komið og margir vinningar komnir í hús.

„Við munum nýta þá vinninga sem við getum geymt til næsta árs en aðrir sem ekki hafa jafnmikinn endingartíma verða nýttir í fjáröflunarviðburðum sem haldnir verða á haustmánuðum, eftir því sem aðstæður leyfa. Við sendum kærar þakkir til allra sem hafa stutt okkur með vinningum í ár sem og önnur ár og komum öflugar til baka með Grímsævintýrin á næsta ári. Tombólan verður að sjálfsögðu á dagskrá að ári, til að kæta og gera okkur áfram kleift að styðja góð málefni í samfélaginu,“ segja kvenfélagskonur ennfremur.