Tómas Birgir Magnússon, núverandi oddviti Rangárþings eystra, skipar efsta sæti N-lista óháðra í komandi sveitarstjórnarkosningum.
Í öðru sæti er Inger Erla Thomsen, sérfræðingur hjá UNICEF á Íslandi, Anna Runólfsdóttir, verkfræðingur hjá SS og bóndi, skipar þriðja sæti og Guðni Ragnarsson, ökukennari, er í fjórða sæti. Listann í heild sinni má sjá hér að neðan en hann skipar fjölbreyttur hópur fólks í sveitarfélaginu með margs konar reynslu og bakgrunn.
Í tilkynningu N-listans segir „N-listinn er eina framboðið í Rangárþingi eystra sem er óháð stjórnmálaflokkum á landsvísu en frambjóðendur eiga það sameiginlegt að brenna fyrir því að gera gott samfélag enn betra fyrir alla íbúa þess. Hvort sem um er að ræða íbúa í dreifbýli eða þéttbýli, börn eða fullorðna, innflytjendur eða innfædda. Flokkslínur stórra stjórnmálaafla á landsvísu aftra ekki N-listanum til framkvæmda.
N-listinn hefur átt í farsælu meirihlutasamstarfi við D-lista Sjálfstæðismanna á kjörtímabilinu. Meirihlutinn setti á laggirnar frístundastyrk í fyrsta sinn í sveitarfélaginu, fjármagn fyrir framkvæmdum á nýjum gervigrasvelli hefur verið tryggt og mikil uppbyggingin hefur verið í sveitarfélaginu. En betur má ef duga skal því fjölmörg tækifæri eru enn til staðar til frekari uppbyggingar og N-listinn er tilbúinn til að halda áfram.“
Í framboði fyrir N-listann í sveitarstjórnarkosningunum 2026 eru:
1. Tómas Birgir Magnússon, oddviti Rangárþings eystra
2. Inger Erla Thomsen, sérfræðingur hjá UNICEF á Íslandi
3. Anna Runólfsdóttir, verkfræðingur hjá SS og bóndi
4. Guðni Ragnarsson, ökukennari
5. Guðmundur Ólafsson, bóndi
6. Anna Margrét Aðalsteinsdóttir, leikskólaliði
7. Karel Geir Sverrisson, bóndi
8. Bjarni Daníelsson, verkamaður
9. Sigurður Orri Baldursson, vörubílstjóri
10. Guðbjörg Konráðsdóttir, viðskiptafræðingur
11. Þórður Tómasson, bóndi
12. Magnús Benónýsson, skósmiður
13. Hjalti Logason, byggingafræðingur
14. Christiane Bahner, lögfræðingur
