Töðugjöldum 2020 aflýst

Hella. Ljósmynd/Rangárþing ytra

Í ljósi breyttra aðstæðna hefur verið ákveðið að aflýsa bæjarhátíðinni Töðugjöldum í Rangárþingi ytra þetta árið.

Fjöldi á samkomum miðast nú við 100 manns og tekur 2ja metra reglan gildi frá og með hádegi, föstudaginn 31. júlí. Töðugjöld 2020 áttu að fara fram dagana 14.-16. ágúst næstkomandi á Hellu.

Að sögn Ágústs Sigurðssonar, sveitarstjóra, stóðu vonir til að halda mætti hátíðina að minnsta kosti að hluta og hafði undirbúningi miðað vel.

„En um þetta þýðir ekki að fást – áfram þurfum við að vera á verði gagnvart farsóttinni og ekki ráðlegt við þessar aðstæður að blása til mikilla hátíðahalda. En þetta mun auðvitað ganga yfir og við hefjum strax undirbúning Töðugjalda næsta árs sem haldin verða 13.-15. ágúst 2021. Það er mikilvægt að hver og einn hugi að sínum sóttvörnum og virði þær reglur sem almannavarnir setja hverju sinni,“ segir Ágúst og hvetur fólk til þess að njóta sumarsins, en fara gætilega.

Auk Töðugjalda hefur bæjarhátíðunum Sumar á Selfossi og Blómstrandi dögum í Hveragerði verið aflýst en þær átti að halda í ágúst.